Kralendijk- E sifranan di Covid ta sigui baha na Boneiru. Aparte di e kantidat total di infekshon ‘aktivo’ den e último dianan por kumins nota awor si e ku e porsentahe di hende ku ta tèst positivo di esnan ku ta bai tèst tambe ta bahando.

Si promé kada bes 40 – 50% di e tèstnan a sali positivo, awor aki esaki ta kai mas den kareda di 25 pa 30%. Esaki ta hopi importante.

Djabièrnè 9 di aprel 2021 tin 148 kaso aktivo di Covid-19 na Boneiru. Di e 41 resultadonan di tèst ku a drenta,10 a resultá di ta positivo. 50 persona a rekuperá di Covid-19. En total tin 21 persona den hospital. Tin 15 persona hospitalisá na Boneiru, 5 ta haña kuido intensivo.

Tin 1 persona den hospital na Aruba i 5 persona den hospital na Colombia.