Sifranan di TCB ta mustra oumento den bishitantenan nobo

KRALENDIJK – E datonan mensual di ofisina di turismo di Boneiru (TCB) ta mustra un oumento di bishitantenan nobo: 43% di e total di bishitante na luna di yüli a bishitá Boneiru pa promé biaha.

Na luna di yüli 2023 Boneiru a yama bonbiní na 14.097 turista ku a keda mas dia. Na 2022 e kantidat tabata 14.133 i promé ku e pandemia, na yüli 2019 e tabata 13.000. Esaki ta nifiká un oumento di 8% kompará ku 2019.

Mayoria di e turistanan a bini di Hulanda i Estados Unido, ku respektivamente 6.771 (48%) i 3.488 (25%) bishitante ku a keda mas dia. 

Kòrsou tambe a kontribuí ku 2.127 (15,1%) bishitante. Ademas por hasi menshon di otro merkado manera Bélgika, Aruba, Alemania, Canada, Suisa, Brazil i Colombia. Ku 238 bishitante ku a keda mas dia na luna di yüli Alemania a postulá su mes komo un di kuater merkado fuerte.

Pa loke ta trata demografia mayoria bishitante tabata  entre 45 i 54 aña. Serka e bishitantenan Merikano e estadonan mas importante di unda nan a bini ta Texas, Californië, Florida, Colorado, Pennsylvania, New York, Georgia, Virginia, North Carolina i New Jersey. Di Hulanda mayoria bishitante a bini di nort i di sùit, ku énfasis riba Noord-Brabant.

Na luna di yüni Boneiru a risibí 16.442 turista krusero, danki na kuater kompania di barku krusero.