KRALENDIJK – E misterio rondó di e morto di e krokodel na Boneiru ta kontinuá.  Mas ku un luna despues di deskubrimentu di e bestia morto ainda Entidat Públiko Boneiru (OLB) i Stinapa no a duna klaridat di e resultadonan di e rapòrt di outòpsia. E misterioso ku e outoridatnan embolbí ta, ta duna kuminda pa spekulashon.

E rapòrt di outòpsia, ku a traha algun siman kaba segun esnan ku sa, ta keda un sekreto bon wardá. Gezaghebber John Soliano lo tin e rapòrt den su poder, pero te ku awe ainda e no a komuniká riba e kontenido. Sjon van Essen, direktor interino di Stinapa i e persona indiká ta inalkansabel, segun e mes a bisa, pa motibu di fakansi. Mientrastantu e komunikashon entre e instansianan konserní ta keda tranká.

Entidat Públiko Boneiru ta referí na departamentu di komunikashon di Stinapa pa mas informashon, pero einan ta pasa e preguntanan tur bia pa e direktor ku ta ousente. Su remplasante temporal tampoko no tin komentario i ta referí bèk na OLB. E referí bai bin aki ta lanta pregunta serka prensa i habitantenan ku ke transparensia.

Spekulashonnan ta sali for di man

E falta di transparensia a kondusí na un ola di spekulashon. Rumornan lokal ta vária di tratamentu deskuidá durante kaptura di e krokodel te konflikto interno kon mester presentá e resultadonan Tin ku ta sospechá mes ku e kousa di morto posiblemente ta kontené un element kontroversial i ku e  instansianan konserní ta preferá  di tene informashon importante atras.