Evento i farándula

Siman di Musik pa Mucha Boneiru a kuminsá hopi bon

Pòtret: Ace Foundation

KRALENDIJK – Djasabra ku a pasa, ACE Foundation a lansa Siman di Musik pa mucha durante e programa Nos Zjilea na Magazina di Rei. E evento a kuminsá ku un diskurso di direktor Segni Bernardina, unda e a enfatisá tema di e aña aki, “Mi Kultura ta Uni-Ko,” ku ta pone atenshon riba e kultura uníko i kohezivo di Boneiru.

E siman ta destiná pa promová unidat i orguyo kultural via musik. ACE Foundation a produsí siete kantika nobo pa mucha, ku ta enfoká riba e aspekto ku ta hasi e kultura di Boneiru úniko. E álbum, titulá “Mi Kultura ta Uni-Ko,” ta disponibel riba e kanal di YouTube di ACE Foundation, ku tur e kantika i dos video musikal nobo: “Indjan Arowak” i “Kultura.”

E Siman di Musik ta kontinuá ku varios aktividat na skol, inkluyendo konsierto i un evento di klousura djabièrnè na Skol Amplio Papa Cornes, ku un livestream riba Live 99.9. Durante e siman, Tio Breezy lo entretené mucha ku kantika via Breezy FM, i Live 99.9 lo tene un programa diaramente kaminda nan ta papia di kultura i musik pa mucha. 

ACE Foundation ta stimulá kreashon di musik positivo pa mucha.

Deel dit artikel
Rocargo
Rocargo
Rocargo
Rocargo