Notisia

Siman kontra Maltrato di Mucha ku tema ‘papia ku amor’

KRALENDIJK – Durante e Siman kontra Maltrato di Mucha na novèmber, Kuido di Hubentut (ZJCN) huntu ku su partner Entidat Públiko Boneiru (OLB), Sentro Akseso Boneiru, Mental Health Caribbean (MHC), Voogdijraad i Expertisecenter Onderwijs Zorg Bonaire (EOZ), ta organisá un kampaña i otro aktividatnan pa pidi atenshon pa maltrato mental den forma di gritamentu di mucha.

Tema: “Papia ku amor” 

E tema di e aña akí ta “papia ku amor”, pa fiha atenshon riba gritamentu di mucha sistemátiko. Esaki ta un forma di maltrato mental.

Elly Rojer (sientífiko di komportashon Kuido di Hubentut):Nos kier informá e hendenan tokante e efektonan i daño di gritamentu di mucha. I kiko por hasi ora señalá e forma di maltrato akí. Tambe nos kier hasi e hendenan konsiente di e dilema di bèrgwensa. Dor di ofresé ayudo i tambe aseptá ayudo si bo mes mester di dje, bo por yuda kibra bèrgwensa. Tribi ofresé un persona ayudo. I papia ku hende den bo propio ret di kontakto. Òf pidi ayudo òf konseho serka instansianan. Pa motibu di drenta den kombersashon hopi biaha por wak huntu kiko ta e mihó aserkamentu den bo situashon.”

Aktividatnan 

Den e siman akí e organisashonnan di ayudo ku ta kolaborá, ta duna atenshon na diferente manera na e mucha ku ta sentral. Profeshonalnan di hubentut i partnernan di e kadena ta duna inisio na e siman na ZJCN. Na tur skol lo parti buki di strep i poster pa e alumnonan, ku kua ta trese e tema Papia ku Amor na nan konosementu. EOZ i partnernan ta papia ku alumno di grupo 7 i 8 di skol básiko tokante maltrato mental. Tambe e bùs ku profeshonalnan di hubentut ta pasa den algun bario pa fiha atenshon riba e tema. E siman ta terminá ku e parada di lampiòn di ‘Dia di Derecho di Mucha’, ku Sentro Akseso Boneiru ta organisá i ehekutá. 

“Tei p’abo” ta apoyá e siman kontra maltrato di mucha!

Na sèptèmber Tei p’abo a start un kampaña amplio kontra violensia doméstiko i maltrato di mucha, rònt di e tema ‘bèrgwensa’. Ku esaki ‘tei p’abo’ ta enfatisá importansia pa saka violensia doméstiko i maltrato di mucha for di esfera di tabú i pa tin atenshon na mes momentu pa bèrgwensa ku ta stroba hende pa kibra e patronchinan akí. 

Un yudansa tin biaha por ta nèt e empuhe ku un persona tin mester. E siman kontra maltrato di mucha ta parti di e kampaña akí, ku ta tuma lugá pa di sinku biaha. 

Wak pa mas informashon tokante maltrato di mucha i violensia doméstiko riba www.meldpuntguiami.com.

Deel dit artikel
Rocargo
Rocargo
Rocargo
Rocargo