WILLEMSTAD – Sindikato di polis NAPB i ministerio di Hustisia a yega na un akuerdo. Ku esaki a yega un fin na interupshonnan di trabou ku a kuminsá djaluna.

Mas ku 100 agente polisial a pone trabou abou pa reuní bou di ora di trabou. A traha un lista di djestres punto di preukupashon, ku tabata trata spesialmente kon e aparato polisial ta anda interno ku e agentenan polisial, inkluso kuido despues di insidentenan, kaminda agentenan polisial a risibí leshon.

Finalmente e partidonan a yega na un akuerdo, despues ku a kita e menasa ‘no work, no pay’ for di mesa. Mando polisial a hala e medida kontroversial aki aden pa e agentenan ku tabata den welga.

A kumbiní ku na momentu di insidentenan di trabou lo aserká un grupo di trabou spesial ku ta okupá su mes ku e insidentenan di trabou. En todo kaso lo atendé e luna benidero e kaso kaminda a tira un agente polisial durante ora di trabou i ku mientrastantu nan a deklará ku e no por traha mas.

Ta bini tambe un tim spesial na ministerio di Hustisia ku ta bai okupá su mes ku maneho di insidentenan na boka di trabou. No solamente pa polis, pero pa tur otro servisionan i e  ministerio di Hustisia mes tambe.