WILLEMSTAD – E sinku Venezolanonan ku wardakosta a interseptá na kuminsamentu di luna di ougùstùs ku mas ku 1000 kilo di kokaina na bordo a haña kada unu sinku aña di kastigu di prizòn.

Sentro di Operashon Marítimo di Wardakosta a mira e boto e tempu ei riba radar. Despues a manda e barku di patruya Groningen i avionnan di Wardakosta riba dje.

Nan a tira dirigí riba e motornan i por a interseptá asina e droga, ku gran parti ya nan a tira den laman kaba.

Durante e tratamentu kuater di e sinku personanan a bisa ku nan no tabata sa ku tabatin kokaina den e karga. Nan a kere ku tabata trata di gasolin ku nan mester  a hiba Puerto Rico. Ta na kaminda numa nan a haña sa ku ta trata di droga.

Un di sinku sospechoso tabata sa esei i no kier a bai bordo di e barku. El a haña un atvertensia ku si e nenga di bai ku e droga nan lo masakrá su famia. Nan sinku lo a haña 60.000 dòler pa e trabou.

Tur sinku a bisa finalmente ku nan a tuma aden pasobra nan famia no tabatin di kome. Nan a pidi wes klemensia pa motibu di e pobresa ku nan ta biba aden i mester sobrebibí.

Wes a baha e kastigu di seis aña di prizòn pa sinku aña pa kada un miembro di tripulante.