Sint Maarten tambe por bai hañ’é ta tuma e sentensia di matrimonio homoseksual Arubano/Kurasoleño

PHILIPSBURG – Si resultá ku ta keda mantené e sententensia di matrimonio homoseksual di Korte Supremo, Sint Maarten tambe méskos ku Aruba i Kòrsou mester ta habrí pa aseptá matrimonio entre personanan di e mésun sekso. E pais tin markonan hurídiko idéntiko. Esei ta kontesta di sekretario di estado Alexandra van Huffelen riba preguntanan di Tweede Kamer.

Den sentensia di korte di apelashon di 6 di dezèmber Korte Komun a disidí ku parehanan di e mésun sekso por kasa ku otro na Aruba i Kòrsou. Kòrsou a bai den kasashon i Aruba ta konsiderá ainda riba e paso pa bai Korte Supremo.

E sekretario di estado ta haña ku den henter Reino derechonan humano fundamental ta konta, pero ta bisa si ku pa paisnan outónomo en prinsipio ta nan mes tin ku disidí.

E ta kòrda Aruba i Kòrsou ku for di e hurisprudensia di Korte Europeo pa Derechonan Humano ta konta ku tin un obligashon positivo riba estadonan pa ofresé legalmente un alternativo, manera por ehèmpel un forma di un registro di pareha na momentu ku nan no ke aseptá e matrimonio, lòs for di e sentensia di Korte Supremo.

“Un kontrakt konsistiendo di hopi faktor ku no ta konsistente, manera Korte Europeo ta yam’é, no ta ekivalente ku un régimen legal. Hopi konsekuensia hurídiko di e matrimonio bo no por logra ku un kontrakt. E obligashon aki ta konta tambe pa paisnan dentro di Reino”, segun señora van Huffelen.

Aruba a dal un promé stap kaba ku konsolidá un registro di pareha legalmente. Ounke e sekretario di estado a hasi un opservashon ku na e momentu aki e registro di pareha no ta un remplazo kompleto di e matrimonio komo ku e konsekuensianan hurídiko no ta méskos ainda.