Kralendijk- Riba djaluna 12 di aprel 2021 akohida pa mucha i skol ta habri atrobe. Esaki a bira posibel despues di un desishon di gezaghèber Edison Rijna riba konseho di Tim di Maneho Insular.

Awor ku Boneiru ta na nivel di riesgo 6, mester duna lès di gemnastik pafó. Na enseñansa avansá ta organisá lèsnan di tal manera ku muchanan por tene distansia di 1,5 meter. Na skol básiko esei no ta nesesario. 

E vírùs di corona ta plama na Boneiru, e isla tin awor prinsipalmente e tipo britániko di e vírùs. Ta transmití e vírùs akí mas fásil. Mucha ta kontagiá otro i adulto ménos rápido ku adultonan entre nan. E último simannan durante e tempu ku skol tabata será, a bakuná dosentenan pa redusí e posibilidat pa e vírùs plama i oumentá siguridat na skol.

1.5 meter

Ta importante pa na skol tur hende tene nan mes na e reglanan di corona.  Kaminda ta posibel, adultonan i alumnonan riba 12 aña ta tene 1,5 meter di distansia, nan mester laba man regularmente, no mishi ku wowo i nanishi i nister òf tosa den èlebog. Mayornan no por ta na skol mas ku ta estriktamente nesesario.

Skolnan i akohidanan pa mucha mes ta informá mayornan di alumnonan ku nan ta habri atrobe. Ademas kada skol mes ta determiná di ki manera e skol ta habri atrobe. Banda di e reglanan general di corona, e skol por pone otro regla tambe ku ta pas ku e skol ei. Último tempu nos ta mira ku e kantidat di infekshon ta baha na Boneiru. Ora skolnan habri atrobe, por sosodé tòg ku tin infekshon na skol. Pero ku e eksperensia ku skolnan i Salubridat Públiko a haña kaba, ta posibel pa aktua rápidamente. 

Kontagio

Den kaso di un kontagio por tuma e medidanan korekto sin bai na sera klas òf skol si no ta nesesario. Salubridat Públiko a pone riba papel pa skolnan kiko nan por hasi si por ehèmpel un dosente ta infektá, òf ora un mucha tin fèrkout. E departamento ta keda den kontakto ku skolnan.