WILLEMSTAD – E solushon di e asesinato riba Boechi Windster lo dependé tambe di e deklarashon di e sospechoso Christopher Zimmerman (24). El a keda ketu te na e promé seshon pro forma, pero a laga e ko-sospechoso Churendy Coffie (44) yam’é afó durante e seshon di esena.

Ámbos a mustra dede riba otro durante un seshon pro forma emoshonal. Segun Churendy Chris a tira pa loko, despues ku promé nan a kore pasa tres biaha dilanti di e rèpdó.

Zimmerman, ku nan ta mira komo e tiradó, a defendé su mes ku alma i kurpa. Tabatin un persona ku kier a mira Boechi morto i amigu Coffie ‘tabata sa masha bon ken a paga’. Segun Zimmerman Coffie kier a eliminá tur marka i laga e asesinato parse un atrako, pero ku defakto tabatin un plan pasobra tabatin hende ku kier a mira Windster morto.

Fiskal a skucha e deklarashonnan durante e tratamentu i seguidamente a puntra Zimmerman si e ta dispuesto pa duna un deklarashon ofisial durante un interogashon. E tabata dispuesto pa hasi esei.

Henter e storia

Ta sospechá ku Churendy tabata stür e outo di huida. Durante e seshon di esena e abogado a pidi pa laga su kliente den libertat, pasobra e ta koperá kompletamente ku e investigashon i a duna tur deklarashon nesesario. Tambe el a entregá su dna boluntariamente.

“Mi no tabata embolbí den e asesinato di Boechi”, Churendy a deklará. “Mi a kore pasa tres biaha riba Rooseveltweg pa wak Boechi, pero mi no a tira. Boso por wak tur kaminda riba kamaranan. Mi a koperá ku e investigashon pasobra mi no a mata niun hende.”

Durante e seshon a bin sali na kla ku e anochi ei tabatin hopi imáhen di kamara riba e kaminda drùk. Wes a pidi ministerio públiko pa traha un kompilashon pa e tratamentu supstansial na òktober.

Mas detenshon

No ta konosí si Zimmerman berdaderamente a duna oido pa testiguá, pero luna pasá a hasi dos detenshon mas. Den oranan tempran di djaluna 17 di yüli tabatain un entrada na e adrès Kaya Aura Winkel den e bario Santa Helena. Durante e entrada a konfiská un arma di kandela, un kaha ku bala i otro artefakto ku ta importante pa e investigashon.

Na e sitio a detené seguidamente D.M.G., un hòmber di 44 aña i J.C.R., un muhé di 38 aña, ámbos nasé na Kòrsou. Nan mester a presentá dilanti un fiskal suplente ku a ordená nan detenshon temporal en espera di e investigashon.

Durante e seshon di esena e kasá di Boechi a bisa via di un yamada via video ku e famia lo eksihí un daño i perhuisio, pero ku lo anunsiá e detayenan durante e tratamentu supstansial di e kaso riba 27 di òktober.