KRALENDIJK – Riba djabièrnè, Bonaire a keda sorprendé i asombrá dor di no ménos ku tres outo ku a kima ménos di binti kuater ora di tempu. 

Dos di e outonan tabata pará na Green Label, mientras ku e di tres tabata dilanti di un garashi na Kaya Monseñor Nieuwindt. Segun informashon di Kuerpo Polisial Karibe Hulandes (KPCN), e promé mèlding na e sentral di alarma a sosodé promé ku mitar di 11 djabièrnè anochi. 

E di dos mèlding a sosodé djasabra mainta, pero tambe relatá na un kandela ku a tuma lugá djabièrnè anochi. Den e último kaso, un hende ku tabata serka mes a logra di paga en kandela. 

Rumor

Despues di e dos outonan ku a kima na Green Label, por a nota ku rumornan a kuminsá kore bou di e habitantenan di e isla. Un emisora lokal a sugerí ku posiblemente un pleitu komersial por tabata tras di e insendio. Un persona ku ta biba serka di Green Label na su turno a pensa ku e outonan a pega kandela, despues ku a sende algu di vürwèrk den serkania di a outonan.  

KPCN ta hasi un investigashon ainda den e akontisimentunan, pero ainda no por a duna mashá informashon konkreto ainda, aparte di konfirmá e echonan ku ta konosí te asina leu. 

Detaye intersante

Un detaye interesante ta e echo ku no muchu leu di e outonan ku a kima awor aki, algun tempu pasá un edifisio kompletu a kima, ku diferente outo den dje ku a keda distruí. Ounke tabata tin sospecho fuerte ku e lugá a wòrdu pegá na kandela intensionalmente, nunka a logra detené un sospecho den e kaso ei.