ROTTERDAM – Polis di Rotterdam a publiká pòtrètnan riba su sitio wèb i riba medionan sosial kaminda e kuater sospechosonan di un hinkamentu den Witte de Withstraat durante Zomercarnaval na Rotterdam ta rekonosibel riba e imágennan.

Siman pasá nan a haña tende ku nan mester mèldu nan mes dentro di shete dia.

“Nan no a hasi esei”, un bosero ta bisa. Polis ta en buska ainda di kuater sospechoso i ta pidi personanan pa mèldu na momento ku nan ta rekonosé e sospechosonan.

Motibu pa e hinkamentu tabata aparentemente un pleitu e anochi di djasabra 29 di yüli den un kaya drùk ku lugánan di dibertishon den sentro di siudat.

Durante e insidente a heridá un hòmber di 29 aña. Mester a hib’é hòspital pa tratamenttu. Debí na motibunan di privasidat e bosero no sa kon su situashon ta.

Riba un di e pòtrètnan ku polis a publiká por mira un hòmber ku un kuchú den su man. Ta sospechá ku ta e a hinka. Por mira tambe ku e sospechoso a kita su kamisa. Ta sospechá e otro tres hòmbernan di violensia públiko.

A publiká kara di tres di e kuater sospechosonan siman pasá ainda vago pa motibu ku probablemente nan ta menor di edat.

Si pa fin di e luna aki ainda no a detené e sospechosonan aki, polis tin pensá di kompartí e imágennan tambe via di e programanan di krímen Bureau Rijnmond i Opsporing Verzocht.

“Imágennan kaminda sospechosonan ta rekonosibel ta kondusí na chèns mas grandi pa detenshon”, segun e bosero. “Sifranan ta mustra ku den kasi 40 porshento di kasonan ta sigui detenshon despues di publikashon di pòtrètnan rekonosibel riba televishon i riba medionan sosial.”