ORANJESTAD- Djarason a mira selebrashon ku hopi entusiasmo di Statia Day, ku ta selebrá tur aña riba dia 16 di novèmber. 

Manera kustumber e dia a kuminsá hopi trempan 6 ‘or di mainta en punto ku gruponan uniformá ku a kanta drenta Fort Oranje. Despues di a hasi bandera di forma seremonial e programa ofisial a kuminsá. Esaki a dura te masomenos 9 ‘or di mainta. 

E aña aki tambe tabata tin vários diskurso pero tambe diferente presentashon di baile i kanto, ku a laga e publiko enkantá. St. Eustatius semper ta pone masha atenshon na selebrashon di su dia nashonal. Despues di e parti ofisial, e presentenan a pasa de kayanan di Oranjestad, kaminda komo kustumber hopi lugá ta bende un desayuno krioyo. 

Boneiru ousente

Algo remarkabel ta ku di parti di Boneiru e aña aki no tabata tin ningun representante ofisial di e isla, mientras ku tur otro islanan hermana tabata tin representashon na e selebrashon. Tambe tabata tin representashon entre otro di Hulanda, St. Kitts i Merka.