KRALENDIJK- Dirigentenan di diferente kanal di radio i televishon na Boneiru a protestá kontra di e manera ku a invitá nan pa partisipá na e siman di periodismo riba islanan BES entre dia 14 di 20 di yüni próksimo. Tambe nan a risibí invitashon pa partisipashon na un evento di Media Pressure Cooker Marathon BES, mas lat den e siman ei.

Segun e invitashon di e organisadónan, meta di e proyekto ta pa aportá na reinforsamentu di periodismo na e islanan BES, pa medio di treinen. Tambe ta spera di haña mas kompreshon di e konhunto di media na Boneiru, St. Eustatius i Saba, koperashon mutuo i tambe komprenshon di e ròl di media serka e públiko. 

Karta

E aktividatnan ta sali for di un karta ku dirigentenan di stashonnan di radio i televishon a skibi dia 27 di yüli 2019, kaminda nan a protestá kontra lantamentu di un emisora públiko na Boneiru. E dirigentenan a mira den esaki un tipo di kompetensia inhustu. Tambe nan a skibi den nan karta di ta dispuesto pa partisipá na diferente aktivitdat, pa yega na un kalidat mihó di medionan di prensa lokal. Pa esaki a hasi un proposishon na e ministerio di OCW. 

Basá riba e karta aki a inisiá vários aktividat. Entre otro a kontratá senora Renske Pin pa hasi un análisis di periodismo i e panorama di medionan na Hulanda Karibense. Tambe a enkargá señora Pin pa bin ku un plan pa reinforsá medionan i tambe pa lanta un agensia di prensa ku lo por produsí notisianan profeshonan I ophetivo pa prensa na e tres islanan. 

Enkuesta

Prensa a kolaborá entre otro ku yenamente di un enkuesta i tabata presente na presentashon di e resultadonan. For di einan, segun medionan di prensa, nan no a skucha nada mas di e plan. Ta netamente e plan aki, lo wòrdu presentá djaluna dia 16 di yüni awor. 

E mesun dirigentenan di stashon di radio i televishon a bisa ku nan no ta akseptá ku durante e Siman di Periodismo, via di pènel i interakshon ku públiko lo establesé si na e islanan BES mester bin un emisora públiko, si òf no. Tambe, asina e stashonnan komersial ta bisa, a indiká klaramente ki dia lo por partisipá na sierto akitividat. “No a tene kuenta ètòl ku esaki”, asina de stashonnan ta skibi. Pa hopi partido ta un problema pa dediká tantu tempu ‘di gòlpi’ dor di partisipashon na e Media Pressure Cooker. 

Bòikòt

E stashonnan ta bisa ku, mirando e situashonnan, nan lo no partisipá na e siman di periodismo BES, i ku nan ta distansiá nan mes di un k’e otro.