KRALENDIJK – E aña akí, Sea Turtle Conservation Bonaire (STCB) ta mira patras riba 30 aña di konservashon eksitoso na Boneiru.

Turtuganan di laman ta keda un tópiko di hopi importansia pa Boneiru danki na e esfuersonan di konservashon ku a keda tumá riba nos isla for di kuminsamentu di añanan 1990. Ta un tremendo ehèmpel di kolaborashon entre e komunidat, e sektor non-profit i gobièrnu.

E meta ku a logra ta un kambio di persepshon i di balor kultural di turtuga di laman, for di un fuente importante di kuminda pa para bira un aspekto ku fama i apresiá komo un parti importante di e salubridat general di Boneiru su ref di koral presioso i na mes momentu pa ekonomia di nos isla, komo ku turtuganan di laman ta un espesie fasinante ku ta atraé sambuyadónan pa bini e isla. 

Si lo no a hasi e trabou akí, kasi sigur turtuganan di laman lo no tabata presente mas na nos isla pa motibu di e status ku nan ta (krítikamente) den peliger di eksistensia rònt mundu. Tin hopi otro proyekto eksitoso mas na mundu. Pero no a alkansá ainda un éksito general di populashon stabil globalmente. Esaki ta indiká ku e trabou mester kontinuá. 

Population stabil

Na algun lugá, manera na Boneiru, e situashon a kambia di e situashon ku tabata mira mas i mas ménos turtuga pa esun di un populashon stabil di turtuga lokal. Sinembargo, tin otro sitio ku ta keda mira sifranan ku ta bahando. E karakter migratorio di turtuga di laman ta pone nos rekordá e konekshon ku kosnan tin ku otro, kambio na sierto sitio lo afektá otro sitio.

E presioso animalnan akí ta invitá nos tur pa traha huntu tantu na nivel lokal komo nivel mundial pa purba di stòp ku nan sifranan di populashon ta sigui baha mas tantu. Meskos ku hopi otro espesie, di kua tin hopi ku a disparsé kaba, e menasa di turtuga di laman ta kousá pa subimentu di pedida di produkto, ku ta mará na e populashon humano ku ta kresiendo kontinuamente, sin ku tin ningun plan di usuario. Eksistensia huntu ku otro i kompartí un planeta huntu ta rekirí un aktitut responsabel i konsiente, i e komunidat di Boneiru meresé kredibilidat pa e trabou ku el a hasi durante e 30 aña tras di lomba. Di un solo persona individual kende na 1991 a tuma desishon pa “hasi algu na e kousa” te ku e investigashon ku ta tumando lugá i e trabou di konservashon di sentenáres di persona pa salba turtuga di laman. Ku e trabou hasí pa voluntarionan, personal dediká, organisashonnan sostenedó, donantenan individual generoso, stazjèrnan, skolnan ku a habri nan porta pa kompartí konosementu ku muchanan, gobièrnu ku a hasi kambio di lei pa yega na protekshon kompleto di turtuga di laman, sentronan di buseo i otro kompanianan lokal i internashonal, partnernan lokal non-profit: ku un kombinashon di harimentu ku lágrima, a krea STCB denter di  e komunidat di Boneiru i ku ta kore den benanan di e isla su identidat i espíritu fasinante. 

Adulto

Kòntá na edat di turtuga, lo konsiderá STCB komo unu adulto ku ta kla pa bai reprodusí pa restu di su eksistensia. E siklo di bida di turtuga di laman ta unu kompliká i yen di peliger for di inisio di su bida. Awor ku STCB ta un organisashon madurá i profeshonal, ta su mandato pa kontinuá ku e trabou sistemátikamente i ku ekspertisio pa suavisá tantu e efektonan humano i komo esunnan relashoná ku wer ku ta forma menasa pa turtuga di laman. Esaki por tuma lugá solamente ku e kontinuo sosten di personanan individual, organisashonnan i institutonan.

STCB su personal i Direktiva ke yama danki na tur hende ku a forma parti di nan biahe di eksistensia di 30 aña. Kada persona embolbí ta parti di e tópiko eksitoso di protehá turtuga di laman na Boneiru.