Notisia

Sterilisashon di kachó i pushi ta keda grátis na Boneiru 

KRALENDIJK – For di 2004 asilo di bestia a paga kaba alrededor di 8.300 sterilisashon. Na aña 2022 a sterilisá 722 bestia, pero ainda esei no ta sufisiente. Ainda tin muchu hopi kachó riba kaya i ainda ta lagando kachónan resien nasí atras na asilo.

Asilo di bestia ta sigui ku un kampaña pa laga hasi mas sterilisashon. Ainda e programa di sterilisashon ta grátis. Tin bruhashon si tokante e palabra ‘grátis’. Tin hende ta kere ku sterilisashon di bèrdat no ta grátis. Ta paga e dòkternan di bestia pa e operashon, pero kontra un tarifa mas abou ku normal, danki na e sèn di asilo di bestia.

“Naturalmente ta fantástiko si bo mes por paga sterilisashon di bo bestia òf si bo ke hasi un donashon na e fondo di sterilisashon. Por uza e sèn ku di e manera aki ta bin liber pa personanan ku no por pèrmití nan mes e gastu aki,” segun un bosero. E asilo di bestia ta paga tambe pa sterilisashon di bestianan abandoná. Stichting Dierenhulp Bonaire tambe ta yuda ku e proyekto di sterilisashon i ta ofresé otro ayudo tambe.

Stapnan

Si bo ke hasi uzo di e programa di sterilisashon grátis, tin un par di stap, dependiendo na unda bo ta bai. Si bo ke bai Klinika Veterinario Bonaire na Kaminda Lagun, djis yama 717 4255 pa traha un sita pa bo bestia di kas. Bo no mester paga pa e operashon.

Si bo ke bai Flamingo Island Veterinary Center na Blvd. Julio A. Abraham, bo mester bai promé asilo di bestia pa haña un bale. Despues bo ta yama 717 3338 pa traha un sita i bo ta bisa ku bo tin un bale. Aki tampoko no mester paga pa e sterilisashon.

Huntu

Asilo di bestia ta spera di por duna mas klaridat ku e informashon aki tokante e programa grátis di sterilisashon i ta enkurashá pueblo pa partisipá aktivamente i traha huntu pa ataká e problema di superpoblashon di bestianan di kas na Boneiru.

Deel dit artikel
Rocargo
Rocargo
Rocargo
Rocargo