Aerolinea i biahamentu

Stewardess di Ultra Air na Colombia ta bisti kèts na lugá di sapatu ku hilchi

Un Airbus A320 na aeropuerto di Medellín. Pòtret: Awor Bonaire

MEDELLÍN- Stewardessnan di e kompania di aviashon nobo na Colombia, Ultra Air, ta bisti kèts na lugá di sapatu ku hilchi.

Segun e aerolínea, e unifòrmi di kada kompania ta un refleho di e personalidat di e marka. “I den kaso di Ultra Air, nos unifòrmnan ta un kombinashon di un vishon modèrno riba e trabou di personal di kabina, pero tambe teniendo kuenta ku kiko e trabou ta enserá”, asina e aerolínea a bisa. Segun Ultra Air, e unifòrmnan ta representá tambe nan balornan komo kompania, manera ‘optimismo’, ‘entusiasmo’, ‘siguridat’, ‘konfiansa’ i ‘serkania’.

E kompania áereo a haña ayudo di e stilista Catherine Villota, ku a diseñá e unifòrmnan. Segun Astrid Elena Giraldo Madrid, hefe di astunan di kabina na e empresa di aviashon nobo a bisa ku a tene kuenta tambe ku e echo ku stewardess mester move hopi i ku nan paña di trabou mester ta kómodo.

Barata

Ultra Air ta un kompania di aviashon nobo ku tin su base operashonal na Medellin, Colombia i aktualmente ta lansando vários ruta pa otro siuidatnan na Colombia, pa prèisnan ku ta kuminsá na 5 dòler pa un pasashi di ida òf di buelta.

Detaye pikante ta ku e empresario tras di Ultra Air, ku ta deskribí su mes komo un kompania di aviashon di ‘kosto ultra abou’ (ultra low cost carrier òf ULCC) ta e eksperto den aviashon, William Shaw, ku algun aña pasá a lanta e empresa Viva Air, ku aktualmente ta e di dos kompania di aviashon mas grandi na Colombia, desues di Avianca.

E hòmber grandi tras di Ultra Air William Shaw, a yuda lanta Viva Air Colombia tambe na aña 2012. Viva Air aktualmente ta e di dos kompania di aviashon mas grandi di Colombia. Pòtret: Awor Bonaire
Deel dit artikel
Rocargo
Rocargo
Rocargo
Rocargo