KRALENDIJK- Fundashon Mariadal (FM) i STINAPA Boneiru ta traha huntu pa añadí vehíkulo di koriente (electric vehicle – EV) na nan fleta komo un inisiativa pa minimalisá nan marka di pia ekológiko i pa protehá naturalesa i hendenan di Boneiru, pa medio di redukshon di emishon di gas invernadero. 

Segun e dos organisashonnan, esaki ta un paso grandi pa loke ta trata sostenibilisashon di e organisashonnan i di nos isla. 

FM, e instituto mas grandi di kuido na Boneiru ku ta responsabel pa kuido agudo, kuido di durashon kòrtiku i largu, diagnóstiko i suministrashon di remedi, pa hopi aña kaba ta hasi trabou di pionero i ta sòru pa solushonnan inovativo pa sektor di kuido na nos isla. Meskos ku STINAPA, kende su mishon ta pa manehá i protehá naturalesa di Boneiru i duna edukashon tokante esaki, huntu tin e meta pa komo henter organisashon ta mas sostenibel i pa den futuro logra sero emishon. 

Fundashon Mariadal a agregá tres vehíkulo eléktriko i STINAPA a añadí dos vehíkulo eléktriko na nan fleta. E vehíkulonan eléktriko akí ta kontribuí na meta di FM i STINAPA pa den futuro logra sero emishon. Un di nos responsabilidatnan komo organisashon prominente na Boneiru ta pa nos tin un funshon di ehèmpel riba tereno di sostenibilidat pa medio di implementashon di e inovashonnan nobo akí, for di edukashon te na uso di e vehíkulonan akí den nos aktividatnan núkleo. 

Inspirá

Ku e paso akí nos ta spera di inspirá otronan pa skohe pa solushonnan mas bèrdè i nos ta spera di kontinuá ku e biahe akí pa asina redusí nos marka di pia ekológiko tambe.