KRALENDIJK – STINAPA lo pèrkurá estriktamente den e simannan binidero ku, e ekstenshon di Waf di Karels ta tuma lugá konforme e regulashon di protekshon di e parke marino vigente na Boneiru.

Durante e 13 aña tras di lomba a adaptá e plan pa ekstenshon di Waf di Karels. Mientrastantu e proyekto ta kumpli ku e kuadro legal vigente pa protekshon di e parke marino. OLB i Rijkswaterstaat a otorgá tur e pèrmitnan ku ta rekirí pa e proyekto. 

Segun STINAPA e pakete di pèrmitnan pa ekstenshon di e waf ta kompleto i ta kumpli ku e e kuadro legal vigente. STINAPA den e simannan binidero lo pèrkurá aktivamente ku e ehekushon di e waf, en bèrdat lo kana konforme e reglanan legal i ku e pèrmitnan vigente i konforme e plan di trabou. 

E manager di STINAPA Bonaire National Marine Park, Judith Raming ta satisfecho ku e koperashon konstruktivo di parti di Karel Visser i di e kontratistanan Richard Duyn i Richard Burger, i ta ekspresá su konfiansa ku durante e konstrukshon lo sigui i kumpli ku e indikashonnan ku STINAPA a duna. 

Resientemente tambe STINAPA rangers bou di guia i supervishon di biólogo marino a move koralnan den e área di konstrukshon, pa prevení daño na e koral nan aki. Mester a laga algun koral na e sitio, debí ku move esaki nan ta minimalisá e chèns di sobrebibensia di nan. E desaroyadónan a diseñá un posibel diseño pa eksponé e koral aki na solo i tambe protegé.