WILLEMSTAD – Kuarenta studiante di Haagse Hogeschool ta pa djesdos dia na Kòrsou, Aruba i Boneiru. Nan ta bishitá diferente instansia, entre kua Konseho Sosial-Ekonómiko, SER, e representashon di Hulanda na Willemstad i Kolegio di Supervishon finansiero.

E intenshon ta pa eksplorá si nan por bin kore stazje den e parti di Reino aki. E studiantenan ta sigui un estudio HBO na Haagse Hogeschool i a sigui un Minor òf un Mayor den Relashonnan di Reino.

Méskos ku aña pasá tambe nan a sera konosí ku e Sekretariado di Konseho Sosial_Ekonómiko, SER. Despues di e bishita di aña pasá dos studiante di Haagse Hogeschool ta kore stazje awor na SER.

Pa motibu di e kantidat haltu di studiante no a organisá e enkuentro na ofisina di SER mes, sino den ouditorio di Archivo Nashonal.

Archivo Nashonal ta ubiká den e edifisio ku tin e nòmber Bolo di Batrei den Skalo.