KRALENDIJK- Djaweps anochi Liseo Boneriano a organisá un anochi kaminda e hóbennan di MAVO i HAVO a presentá nan ‘Profiel Werkstuk’. Anisha Saragoza, alumno di e skol, di  HAVO 5 a papia ku prensa loke tabatin e anochi na skol. 

“Hóbennan di skol tantu MAVO i HAVO por a skohe un tarea pa nan presente riba e dia. Kada klas parti den e muchanan a skohe un tópiko i a hasi un investigashon di esaki pa yega na informashon pa presentá riba e dia. For di desèmber e aktividat mester a tuma lugá, sinembargo debí na e problema di e pandemia di covid-19, a posponé pa awor.   

Hopi hende a presensiá loke hóbennan a prepará pa e anochi na Liseo Boneriano. Tur aña skol ta organisá e aktividat pa e hóbennan gana eksperensia kuné, loke nan ta haña punto pe tambe,”Ainsha Saragosa a bisa.

Impreshoná

Diputado Hennyson Thielan tabata presente i a keda impreshoná di algun grupo di hóbennan ku el a logra tuma nota di loke nan a presentá. “Nos a sigui un presentashon i e ta bata hopi great, ta muchanan ku a buska informashon serka nos, pues tabata un hopi interesante. Nos a hasi pregunta durante e presentashon i e hóbennan ta reakshoná hopi stabil riba e preguntanan. Un tremendo aktividat pa por topa ku hende i ménos medida pa tene kuenta kuné. Nos ta spera kos sigui desaroyá den e direkshon aki loke ta trese generalmente mas aktividat riba e isla,”diputado Thielman a bisa.