DEN HAAG – Minister demishonario Carola Schouten ta hisa e sueldo mínimo legal na Boneiru, Saba i Sint Eustatius te 143 porshento riba e referensia mínimo sosial. Esaki e ta skirbi Tweede Kamer.

A introdusí e subida despues ku a oumentá kompensashonnan mínimo, manera ònderstant, penshun di behes general i kompensashon di famia di defuntu, konforme e referensia.

Pa sigui mehorá seguridat sosial, lo baha tambe gastunan di bibienda, energia, telecom, awa i akohida di mucha.

Segun e minister e referensia mínimo sosial ta un instrumento di maneho importante ku tin komo meta pa mehorá e nivel di bida i kombatí pobresa. E maneho ta basá riba investigashonnan di 2014 i 2018, kaminda e nesesidat pa oumento di entrada i bahamentu di gastu a bini dilanti.

Schouten ta enfatisá ku mehorashon duradero di e seguridat sosial no ta dependé solamente di oumento di entrada i bahamentu di gastu, pero tambe reforsando ekonomia i merkado laboral.

E ta mustra ku a dal pasonan kaba, pero ku mester sosodé mas pa garantisá seguridat sosial di e habitantenan di Karibe Hulandes.

Komishon

E minister ta spera ku e resultadonan di e Komishon mínimo sosial Karibe Hulandes lo ta disponibel pa mas tardá 1 di òktober di e aña aki. Den e mésun liña ku un moshon anterior di Kamer, e plan ta ku seguidamente ta stipulá mas pronto ku ta posibel un mínimo sosial pa Karibe Hulandes.

Pa antisipá riba e resultadonan di e komishon, minister Schouten ta traha huntu ku e sekretario di estado demishonario di Asuntunan Interior i Relashonnan di Reino riba diferente senario ku ta relashoná ku tantu e banda di entrada komo e banda di gastu. Ta inventarisá tambe e konsekuensianan finansiero.

E minister ta bisa ku lo kompartí e desaroyo di e senarionan aki ku Tweede Kamer promé ku tratamentu di presupuesto di e ministerio di Asuntunan Sosial i di Labor. Di e manera aki nos ta embolbí Kamer den toma  di desishon i e diskushonnan rondó di stipulashon di e mínimo sosial na Karibe Hulandes.