Kralendijk- Banko di Seguro Sosial di Kòrsou (SVB) ta bai kumpli tòg ku un veredikto di korte kaminda a prohibí pa sigui kòrta den AOV di esnan ku ta risibí un penshun di behes di e instituto aki, asina abogado Mr. Michiel Bijkerk a skibi riba su página di Facebook.

SVB, na momentu dado, a disidí di bai kòrta den pago di penshun di tur penshonado di Antia Hulandes ku no ta bibando na Kòrsou. Bijkerk pa hopi aña tabata bringa kontra di e medida aki, ku segun e tabata algu inhustu.

Siman pasá diputado Nina den Heyer tambe a hasi un apelashon riba SVB, pa kumpli ku e veredikto den korte.

Buèlta

“Na promé instansia SVB-Kòrsou a duna di konosé por eskrito ku nan lo NO kumpli ku e veredikto di Korte di Hustisia di dia 1 di mart 2021. Pero despues di diferente buèlta nan a anunsiá dia 16 y 17 di yüni 2021 ku nan lo kumpli tòg”, asina Bijkerk ta skibi.

Tur penshonado na Boneiru, SXM, Saba y Statia lo haña nan sèn bèk ku forsa retro-aktivo te 2016/2017. Tantu e parti ku a ser kòrtá (10%) for di yanüari 2017 komo e kerstbonus anual for di 2016.