DEN HAAG – Ta indeksá e suèldu mínimo legal riba tur e tres islanan. Pa Boneiru e ta subi ku 2,5% na $10,35 pa ora, na Sint Eustatius ku 3,1% na $10,41 pa ora i na Saba ku 2% na 10,30 pa ora. E suèldu pa siman òf luna ta dependé di e kantidat di oranan ku a traha. Personanan ku tin derecho riba penshun di behes (AOV) ku akumulashon kompletu ta risibí entrante yanüari 2025, $1.525 pa luna na Boneiru, $1.534 na Sint Eustatius i $1.517 na Saba. E asina yamá “kompensashon di gastu” ku benefisiarionan na Islariba ta risibí, ta inkluí den e montantenan menshoná. Tambe benefisiarionan di AOV ku ta biba pafó di Hulanda Karibense ta risibí un montante di $1.517 pa luna ku akumulashon kompletu.

E kompensashon pa yu tambe ta subi. Mayor- i mayornan di kriansa lo risibí $231 pa luna pa kada yu na Boneiru, $223 na Sint Eustatius i $230 na Saba. Ademas ta adaptá ònderstant i otro benefisionan sosial tambe, manera AWW.

Pa kompensá dunadónan di trabou pa e gastunan salarial mas haltu debí na oumento di e suèldu mínimo legal den 2024, ta baha e primanan sosial di dunadónan di trabou, inkluso e prima di seguro di kuido, entrante 1 di yanüari 2025 ku 1,6%. Huntu ku e redukshon anterior den 2024 e bahada total ta suma 3,1%.

Desaroyo di preis

Ku e ahuste di e montantenan nobo, e ministerio ta sòru pa e suèldu mínimo, kompensashon pa yu i benefisionan sosial ta ahustá segun desaroyo di preis midí pa Ofisina Sentral di Estadístika for di e di 3 kuartal di 2024. Aki ta tene kuenta ku diferensianan mutuo den desaroyo di preis na Boneiru, Sint Eustatius i Saba.