ORANJESTAD – Aruba ta bai instalá kámaranan CCTV riba palunan di lus pa vigilá karnavalistanan i e públiko kant’i kaminda den kuadro di siguridat. E instalashon ta parti di e proyekto ‘barionan sigur’.

Durante di e òptògt di flambeu na komienso di e luna aki tabatin mas detenshon kompará ku e último optògt di flambeu na 2020. Na tur a arestá djesnuebe persona pa diferente insidente. Mayoria detenshon tabata pa desórden públiko manera entre otro buracheria públiko.

Ounke e djesnuebe detenshonnan a generá 11.400 florin pa gobièrnu, e meta di e programa “Faya bo Haya” no ta pa generá sèn, pero ta para pa siguridat pa un i tur i pa pèrkurá ku tur hende ta yega nan kas bèk sano i salvo despues di e òptògtnan.

Pa garantisá esei gobièrnu i ELMAR ta bai traha huntu den un proyekto piloto pa pone kámaranan riba tur palu di lus riba e ruta di e òptògtnan di karnaval, tantu na San Nicolas komo na Oranjestad.

ELMAR a pone e infrastruktura disponibel pa instalá tur kámara.