Ta bai renobá Ofisina di Impuesto Kòrsou porfin despues di kuater aña 

WILLEMSTAD – Kuater aña despues di e kandela na ougùstùs 2019 a kuminsá porfin ku e trabounan di renobashon i remodelashon di e ofisina di impuesto na Regentesselaan, e matutino Èxtra ta informá.

Mirando e sirkumstansianan natural i e sabotahe ku e edifisio mester a sufri, hopi a pensa ku lo a tumba e edifisio, pero e aktual minister di Finansas a skohe pa renobashon. Segun e minister  finansieramente esei lo ta e mihó opshon.

Konkretamente mester pone sèn aserka, pasobra e seguro di e edifisio no tabata sufisiente pa kubri tur daño. Na 2019 a kalkulá e daño riba alrededor di 42 mion florin.

Ta kuminsá ku e trabounan na e parti pafó di e edifisio ku un aparensia renobá di e edifisio. No ta konosí ainda kon largu e trabounan di renobashon lo dura.

Finalmente esaki ta nifiká ku e personal di Inspekshon i Kobradó Públiko, ku aktualmente ta alohá den WTC, lo bai bèk nan anterior ofisina.