WILLEMSTAD – Gobièrnu di Kòrsou a disidí pa prolongá supsidio riba kombustibel ku tres luna. 13 di novèmber ta evaluá si ta mantené e 24 sèn pa liter di kombustibel.

Den di dos kuartal di e aña aki a introdusí e supsidio pa motibu di e subida drástiko mundial di preis pa kombustibel.

Pa evitá mas subida di preis minister di Finansas a entregá un proposishon serka Konseho di Minister pa prolongá e supsidio tres luna mas.

For di un análisis a resultá ku e preis aktual di fiul di 101,62 dòler pa barí ta kasi riba e mésun nivel ku den luna di mei na momentu ku a introdusí e supsidio.

Ta kompensá e pèrdida ku ta spera di e medidanan di sosten pa preis di kombustibel ku e entradanan di impuesto di benta di 2022 balorá na 539 mion. E rendimentu aki por sierto ta kasi 90 mion florin mas haltu ku e 450 mion ku a aprobá den e presupuesto di 2022.

Ta p’esei segun minister di Finansas por dedusí ku otorgamentu di e rebaho temporal aki a sosodé na un manera responsabel.

Kalkulashon di e preisnan di kombustibel ta konsistí di diferente komponente, entre kua impuesto i akseins. Minister Silvania, ku ta responsabel pa ámbos komponente, na su turno ta stòp temporal  ku kobransa di OB riba preis di kombustibel. A baha akseins riba gasolin i e montante total di OB riba gasolin tambe a baha.