KRALENDIJK/WILLEMSTAD -Ta Fundashon Mariadal su kaprichonan mes tin e hospital kaminda e ta, ku asuntu di Air Ambulance.

Esaki tabata e ponensia di abogado Quincy Carrega di e bufete di abogado Asjes Carrega, ku a representá Dutch Caribben Air Service Provider (DC-ANSP) den un huisio sumario ku a tuma lugá djarason na Kòrsou. 

Pa medio di e huisio sumario, Fundashon Mariadal huntu ku Sarpa a eksigí ku autoridatnan di aviashon, entre otro Curaçao Civil Aviation Auhtory (CCAA) i DC-ANSP duna Sarpa e pèrmitnan nesesario, ounke sea temporal, pa e kompania Kolombiano por ehekutá buelonan entre e islanan ABC, St. Maarten i St. Eustatius. 

Hurista di parti di Gobièrnu di Kòrsou, Giselle Hollander, ku formalmente a representá minister di Tráfiko Charles Cooper a splika na plaka chikí ku Sarpa no solamente no tin e pèrmitnan nesesario, pero tambe ku e petishon di Sarpa no ta pas den e protokòlnan ku ta eksistí entre Kolombia i Pais Kòrsou. 

Hollander a splika tambe ku Kolombia di su banda tampoko no ta pèrmití kompanianan di Kòrsou òf e otro islanan pa transportá pasahero, ni tampoko pashènt, entre dos siudatnan na Kolombia. “Ta kiko a duna Sarpa e konfiansa ku nan si lo haña e tipo di derechonan aki banda”, asina Hollander a puntra di forma retóriko. 

Traha plaka

Carrega di su banda tabata hopi skèrpi riba aktutut di Fundashon Mariadal ku ela deskribí komo hopi kaprichoso. “A splika Fundashon Mariadal na vários okashon -for di aña 2020- ku loke nan ke, no por! Pero tòg a sigui persistí i insistí, te ku nan a ehekutá buelonan pa lokual nan no tin pèrmit, ni derecho”, asina Carrega a bisa. 

Carrega sinembargo a bai mas leu. “Awe nos ta sinta dilanti bestuursrechter, ku un kaso kontra di gobièrnu. Pero en realidat e kos aki ta un kaso sivil, k uta bai tokante trahamentu di plaka. Fundashon Mariadal ke hasi negoshi”, asina Carrega. Ela sugerí tambe ku Mariadal a bira haragán riba sèn anto ku nan, komo hospital, ke kome un pida di e bolo pa loke ta trata e ganashi ku Medicair a hasi den pasado ku ehekushon di e buelonan di Air Ambulans. 

Carrega a bisa tambe ku e hospital mes a hinka su mes den e situashon aki, kreando un situashon ku fásilmente por a evitá i ku ainda por evitá dor di sinta bèk na mesa ku Medicair N.V. ku ta un kompania lokal ku sí tin tur e permitnan nesesario, ademans avion i hopi aña di eksperensia. 

Veredikto

Wes Martinez, despues di a skucha e kaso i hasi vários pregunta na ámbos partido a bisa ku e ta pone dia 13 di mart komo fecha riba kua lo dikta sentensia pa loke Mariadal ku Sarpa a eksigí pa medio di e husio sumario.