Ta mihó pa yama Call Centre despues di 10 or di mainta

Kralendijk – Siudadanonan ku ta yama e number grátis 0800 0800 pa un sita pa tèst òf pa por ehèmpel nan resultado di tèst mester tene kuenta ku entre 8 or i 10 or di mainta e liña akí ta hopi okupá.  

Awor ku na Boneiru e kantidat di kontagio ku corona ta subi, e yamadanan pa e number grátis 0800 0800 tambe ta oumentá, asina departamento di Salubridat Públiko a duna di konosé. Pa e motibu akí e departamento ta konsehá hendenan pa si ta posibel yama den oranan ku no ta hopi drùk. 

Último dianan hendenan ku ta yama a mèldu na e departamento ku ta difísil pa nan haña un empleado na liña i e ora ei nan ta sera e telefòn. Departamento  di Salubridat Públiko ta lamentá esaki. E konseho pa e personanan ku ta yama akí ta pa no sera e telefòn ora nan no haña un empleado mesora na liña. Nan por konta ku ta atendé un persona ku ta yama i ku tin ku warda sigur. 

Eksterior

E number grátis 0800 0800 ta alkansabel for di djaluna te ku djasabra di 08:00 – 12:00 or i di 13:00 – 20:00 or i riba djadumingu di 0800 – 12:00 or. Hendenan ku yama den siman entre 12:00 i 13:00 or, ta skucha un grabashon ku e oranan ku e callcenter ta habrí. No tur ora por yama e number grátis 0800 0800 for di den eksterior. Hendenan ku ta yama for di den eksterior por yama tambe number +599 715 5399, e number akí no ta grátis.