Ta stimulá reaktivashon di hende grandi

Kralendijk – E proyekto piloto (Re)aktivashon di Hende Grandi tei pa stimulá nos grandinan pa ta mas aktivo i pa tin mas kontakto ku otro. Departamento di Sosten Sosial i Labor (Maatschappelijke Ondersteuning en Arbeid – MOA) di Entidat Públiko Boneiru ta traha huntu ku e sentro di salú Bon Bida Boneiru, Mental Health Caribbean i Zorg en Welzijn Groep riba e proyekto akí.

E proyekto (Re)aktivashon di Hende Grandi ta hasi e sírkulo sosial di e partisipantenan mas grandi i tantu riba tereno físiko komo mental e ta mehorá salú i estilo di bida di e partisipantenan. Dia 22 di yüni 2021 e proyekto akí a kuminsá ku 30 hende grandi den kategoria di edat di 55 te 95 aña. Pa motibu ku ta trata di un grupo di enfoke vulnerabel, a repartí e grupo den tres grupo mas chikitu. Kada grupo ta konsistí di 10 hende grandi ku un biaha pa siman ta partisipá na diferente aktividat.

Aktividat

E aktividatnan di (Re)aktivashon di Hende Grandi ta konsistí di entre otro bingo, bon kuné, aquafitness, kushiná huntu, bishitá Mangazina di Rei i Botanical Garden, un paseo den bùs na e parti sùit i e parti nort di Boneiru i un kurso di prevenshon di kaimentu. Na momentu di ehekushon di e aktividatnan a tene kuenta ku e medidanan di Covid-19. For di (Re)aktivashon di Hende Grandi a regla transporte (adaptá). A buska e 30 partisipantenan na kas i a hiba nan bèk atrobe.

Registrashon

E proyekto piloto a dura 15 siman, pero ta bai prolong’é. Bo tin mas ku 55 aña i bo ke partisipá na e siguiente grupo? Tuma kontakto ku Shaëdra Baromeo na number di telefòn 777-3745.