Kralendijk- Segun gezaghèber Edison Rijna, ta trahando duru pa pronto por kita obligashon di hasi tèst di PCR ora di biaha entre e islanan, primeramente Boneiru i Kòrsou, pero posiblemente tambe Aruba.

Den promé instante e idea ta pa eksonerá biaheronan ku ta kompletamente bakuná kaba di e obligashon pa hasi e tèst ámbos ora di bai i ora di bini bèk.

Esaki sigur lo ta un alivio grandi pa pasahero, ya ku -aparte di e molèster pa pasa e tèst- biaharonan aktualmente ta gasta den kareda di 200 dòler djies pa hasimentu di tèst, sin tuma e gastu di e pasashi mes na kuenta.

Rijna no por a bisa ainda ki dia eksaktamente ki dia lo kita e obligashon aktual, pero e promé mandatario a bisa den konferensia di prensa djarason atardi ku posiblemente ta logra esaki den 1 pa 2 siman mas.

Aruba

Entretantu promé minister di Aruba, Evelyn Wever-Croes a anunsiá kaba ku residente ku ta kompletamente bakuná lo por biaha di Kòrsou pa Aruba sin pasa tèst di PCR. Probablmente esaki ta bai konta tambe pa biaheronan ku ta sali for di Boneiru pa biaha bai Aruba.