KRALENDIJK- Kanal di televishon NOS-TV a start djaweps anochi ku un siklo di programa relashoná ku elekshonnan pa un konseho insular nobo ku ta bai skohe 15 di mart 2023.

Eksperto di media Jericette Moniz ta presentá e programa. Den e promé transmishon a invitá dos representante di Partido Demokrat. Tabata trata di e lider di partido Clark Abraham i e number ocho riba e lista di kandidatonan, Gianni van der Heuvel.

Tambe tabata invitá den studio Sikólogo Harald Linkels, ku huntu ku ABC online media a hasi un investigashon e último dos simannan pa loke ta trata e komportashon di vota planiá i e motivashon su tras. Linkels a splika e intenshon di e investigashon, ku tabata konsistí di un online poll den kombinashon ku mas ku 100 enkuesta kara-ku-kara.

Den e programa ta usa tantu Hulandes komo Papiamentu, di manera ku mas hende por sigui e programa.

A trata entre otro e plan- i ambishonnan di Partido Demokrat, pero tambe e motibunan ku partisipantenan ta trese dilanti pa vota riba un partido. Linkels a splika ku un gritu ku ta tende hopi ta e deseo pa kambio. Tambe hopi partisipante ke mira mas hóben den polítika. Den tantu e online poll komo den e enkuesta kara-ku-kara e partido di Abraham a sali komo un ganadó potensial di e elekshonnan.

Positivo

Ounke e programa a kuminsá mas lat ku tabata planiá i tambe a pasa tempu, e diskushonnan tabata bibu i hopi reakshon a drenta. Un opservadó a hasi e pregunta dikon no por haña programanan di partido niun kaminda. Segun Abraham su partido ta duda pa presentá nan programa komo esun promé, pasobra den pasado por a mira ku un partido kontrali a adoptá e puntonan di lansa mésora.

Linkels a remarká ku riba e isla tin mas i mas votadónan di orígen Hulandes presente. Nan ta duna di konosé ku nan tin hopi problema ku e echo ku no por haña programanan di partido. “Ta trata hopi biaha di votadónan nobo i nan no tin idea pa kiko e diferente partidonan ta para”, Linkels a remarká.