Ta uza tanki di rekompreshon atrobe na Boneiru 

KRALENDIJK – E tanki di rekompreshon na Boneiru ta den servisio atrobe, despues di yegada di un dòkter nobo.

Stichting Recompressietank Bonaire tabata sin dòkter di buseo despues ku dòkter van der Vaart a bai ku penshun na komienso di e aña aki. Apesar di esfuersonan intensivo pa haña un dòkter nobo esaki a frakasá i a sera e tanki temporalmente riba 20 di febrüari.

E direktiva di e fundashon a lamentá e desishon aki, pero a rekonosé ku nan no por a garantisá e servisio di 24/7 pa e pashèntnan.

Mientrastantu ku yegada di e dòkter di rekompreshon, dr. Lucia Rodrigues, na komienso di luna di yüli, e tanki ta kompletamente operashonal atrobe.

Dr. Lucia Rodrigues, ku ta prosedente di Brazil, ta un dòkter entusiasmá ku un pashon pa hende i laman. Mientras e tabata spesialisá den medisina di Malesanan Infeksioso i Tropikal, e tabata desaroyá su mes tambe komo sambuyadó rekreativo. Despues ku e mes a eksperensiá un hipotermia (ora bo temperatura di kurpa baha demasiado) durande un buseo, Rodrigues kier a siña mas tokante téknikanan di buseo seif i buseo di reskate. Awor e ta spesialisá den medisina di buseo i hiperbárika i Reskate Médiko.