RINCON – Talento Kultural, e grupo di mucha i hóben ku ta trein nan talento musikal i di baile na Mangazina di Rei, a duna nan promé show despues di basta tempu djabièrnè último 22 di òktober.
E grupo aki ku ta konsistí di kasi 25 mucha i hóben a wòrdu di trein pa Wesley Sintjago i Gonsalvo Goeloe pa e parti di tokamentu i kantamentu. Jumira Goeloe i e pareha bailado Duo Mirasol, Donny i Monique Winklaar, ta responsabel pa e parti di baile.
Nos Zjilea
E muchanan ta trein kada siman i normalmente ta duna nan presentashonan durante evento kultural Nos Zjilea ku Mangazina di Rei ta organisá.
Debí na tur e restrikshonan en konekshon ku Corona e muchanan no por a presentá pa publiko pa mas ku un aña pero sí nan a wòrdu filmá den diferente presentashon online.
E show di djabièrnè último tabata titulá “Nos kultura i folklor den un kaska di pinda”. E show a trese piesanan dilanti di kada fiesta kultural ku ta selebrá durante di henter aña. E muchanan mes a toka, kanta i baila, bou di guia di nan lidernan i ku yudansa di grupo Tutti Frutti.
Tabata tin un publiko chikitu; mayoría tabata mayornan i konosínan di e muchanan. Nan a disfrutá di e muchanan i a atmirá nan kresementu i talento.
Registrashon online pa bakuná awor habrí pa esnan 18 aña bai ariba
Hopi awaseru na kaminda pa islanan ABC kousá pa sistema tropikal nobo
ACE Kids Club su Vacation Art School organisá pa di dos aña konsekutivo
Preis di gasolin i disel ta baha 
