KRALENDIJK- Komo regalo pa Dia di Tata, riba djaluna 20 di yüli tatanan tin mag di bira miembro grátis di biblioteka. 

Ku e akshon akí biblioteka ke stimulá nos tatanan pa bai lesa mas tantu. E kolekshon di biblioteka tin hopi buki ku nos tatanan por rekonosé nan mes aden. Lesamentu ta amplia konosementu i pa medio di lesamentu nos ta sera konosí tambe ku horizontenan nobo. Biblioteka tin un variedat amplio di tipo di buki: buki di informashon, novela basá riba fikshon i tambe novela ku no ta basá riba fikshon. 

Biblioteka tin hopi buki pa mucha tambe ku e tatanan por lesa pa nan yunan tende. Ora bo ta lesa buki pa bo yunan tende, bo ta fortifiká e laso ku bo yunan i esaki por sòru ku e muchanan ta bai gusta lesa mas tantu. Papa por fungi komo ‘role model’: su yunan ta sigui su bon ehèmpel. Lesa pa bo mes i lesa pa otro tende ta plasentero i ta promové desaroyo di idioma,  perspektiva riba mundu, desaroyo general i hopi mas.

Sorpresa

Den kuadro di Dia di Tata tur nos tatanan di Boneiru ta bon biní na Biblioteka Públiko Boneiru entre 17:00 or i 18:00 or. Nos ta bai malkriá nan ku un miembresia grátis i un sorpresa chikitu. Pa stimula lesamentu digital e tatanan akí ta haña tambe nan datonan pa ‘log in’ pa e Biblioteka Online.

Miembresia te ku 18 aña ta grátis. Pa miembronan mas bieu ku 18 aña un miembresia ta kosta $ 6,- pa aña. Riba djaluna 20 di yüni tatanan por bira miembro grátis di biblioteka. Biblioteka ta keda na Kaya Gramèl s/n.