KRALENDIJK – Dia 18 i 20 di novèmber último, Fundashon Lesa Ta Dushi (FLTD) a organisá un tayer pa eskritor aspirante. E tayer aki tabata kontinuashon di un training bou di guia di señora Evelien van Dort pa skibi na nivel adaptá pa mucha. Evelien a skibi i publiká entre tantu nobenta buki pa mucha, di kua algun a wòrdu tradusí na Papiamentu tambe. ‘Idioma materno ta e base kaminda kada mucha por sinti su mes na kas den e mundu di idioma, palabra i komprendementu. Kada idioma ta un Fuente úniko di konosementu di propio kultura’, segun Evelien.

E tarea ku e partisipantenan a risibí durante e tayer tabata pa skibi un kuenta pa mucha tokante herensia kultural, por ehèmpel tradishonnan na Boneiru. Tabatin diesdos persona ku a partisipá na e tayer. Algun di nan a yega di publiká buki kaba, pero a siña algun punto nobo ku nan por usa den futuro pa skibi un buki na nivel adaptá.

E tayer a kuminsá djaluna ku splikashon di Evelien tokante aspektonan ku outor mester tene kuenta kuné ora e ta skibi kuenta pa mucha. E partisipantenan a haña tep pa banda di skibi tokante por ehèmpel Mamparia Kutu, por skibi tokante kon pa deskubrí amistat tambe.

Tambe tabatin atenshon pa e relashon entre tópiko, edat i nivel di esun ku ta lesa.

Despues e partisipantenan mester a skibi un kuenta kòrtiku i a risibí feedback serka Evelien. Na final di e promé anochi e partisipantenan a haña tarea pa skibi un kuenta di 20 liña na Papiamentu òf Hulandes tokante herensia kultural di Boneiru.

Riba djárason, e di dos dia dje tayer, e partisipantenan a lesa nan kuenta i risibí feedback serka Evelien i otro partisipantenan. Na final di e tayer señora Evelien, señora Mazarella Jansen(presidente) i señora Monica Clarinda (koordinadó di FLTD) a entregá sertifikado na e partisipantenan. FLTD ta gradisí Literatuur Vlaanderen, Nederlands Letterfonds, Taal Unie i Fundashon Wega di Number Bonaire pa nan gran aporte financiero. Un danki tambe na tur ku a partisipá òf yuda pa hasi e ta tayer un éksito. Ta e intenshon pa publiká tur kuentanan skibí durante e tayer. Esaki lo sosodé den transkurso di otro aña.

Dor di publiká kuenta di diferente outor lokal, FLTD ta spera ku Boneiru ta bira un isla lesadó i ku nos muchanan por haña mas literatura na nivel i den dos idioma.