Kralendijk- E aña aki, Tourism Corporation Bonaire (TCB) huntu ku Fundashon Echo lo selebrá “Earth Day” (pap.: “Dia di Mundu”) virtual riba e página di Facebook “Bonaire Tourism”.

Djaweps dia 22 di aprel ta Dia di Mundu. E tema di e aña aki ta: “Restore Our Earth”. Dia di Mundu ta un movementu mundial di medio ambiente, ku e propósito pa protehá i konservá nos planeta. Mas ku 1 bion partisipante rònt mundu ta selebrá Dia di Mundu ku diferente inisiativanan i eventonan manera; planta mata, “clean-ups” of partisipá na un aktividat eko-aventura.

Pa konmemorá Dia di Mundu, TCB ta kompartí den 22 dia, 22 diferente manera kon Boneiru ta selebrá Dia di Mundu tur dia. For di promé di aprel, por a mira e diferente maneranan kon Boneiru ta selebrá Dia di Mundu tur dia riba e páginanan sosial “Bonaire Tourism” i “Bonaire Toerisme”.

Live

Dia 22 di aprel, TCB huntu ku Fundashon Echo lo selebrá Dia di Mundu kuminsando ku un “live streaming” for di 8 ‘or di mainta na parke Dos Pos. Durante di e “live streaming”, publiko por atmirá e “Amazon Yellow-Shouldered Parrots”, mihó konosí komo nos loranan, ku ta reabilitá na e parke, i tambe e publiko por interaktua ku e ekspertonan na Fundashon Echo. Despues di esaki, 4 ‘or di atardi lo tin un seshon di “Q&A” i e publiko lo tin e oportunidat pa hasi pregunta na e ekspertonan di Fundashon Echo. Por sigui e “live streaming” riba e página di Facebook “Bonaire Tourism”.

TCB i Fundashon Echo Boneiru ta ekstendé un invitashon na pueblo di Boneiru pa bin selebrá Dia di Mundu ku nos, dia 22 di aprel próksimo via Facebook “live streaming” for di parke Dos Pos.