KRALENDIJK- Segun sifranan preliminar di Tourism Corporation Bonaire (TCB) na luna di febrüari 2023 Boneiru a yama bon biní na en total 15811 bishitante stayover.

Ku esaki registrá mas ku 15,4% mas bishitante stayover kompará ku febrüari 2019. E dos merkadonan di origen mas grandi di nos isla ta mustra vários señal di kresementu. Tabatin en total 7882 bishitante hulandes (49%) i 3972 bishitante stayover merikano (25%). 

Nos bishitantenan stayover hulandes ta bini prinsipalmente for di e parti sùit i nort di Hulanda. Mayoria di nos bishitantenan stayover merikano ta bini for di e siguiente ocho estadonan: New York, Florida, Pennsylvania, Wisconsin, California, Massachusetts, Michigan i Minnesota. Mas aleu 1442 (9%) di tur e bishitantenan na Boneiru a bini for di nos isla besiña Kòrsou. 

Canada

Den luna di febrüari Boneiru a risibí 497 turista stayover kanades, ku kua Canada luna pasá a bira e di kuater merkado di nos isla ku a presta mas mihó.

Vários merkado sekundario, entre otro Alemania, Aruba, Bélgika, Fransia, Suisa i Reino Uní den luna di febrüari 2023 a mantené e mesun partisipashon den merkado kompará ku yanüari 2023.