KRALENDIJK – Tourism Corporation Bonaire (TCB) ta lansa su promé módulo di e Bonaire Expert Program – Programa di Eksperto di Boneiru.

E programa ta brinda agentenan di biahe e oportunidat pa siña mas tokante nos destinashon, nos komunidat i nos oferta. Vishon di TCB ta pa eduká i inspirá nos partnernan tokante nos destinashon. Ta importante pa komprendé historia i e karakter úniko di e destinashon. E promé módulo di e kurso online nobo riba e ‘E travel training platform’ ta dirigí su mes riba profeshonalnan hulandes di biahe. E kurso online interaktivo akí ta enfoká riba e eksperensianan úniko di nos isla i ta brinda agentenan di biahe na Hulanda e oportunidat pa tèst nan konosementu di ‘Bonaire Expert’ i siña tokante nos isla, pa asina bira un berdadero eksperto sertifiká di Boneiru.

Despues di terminá e kurso online eksitosamente, e partisipantenan ta risibí un sertifikado ku ta ratifiká nan státùs komo eksperto di Boneiru. Meta di TCB ta pa engrandesé konosementu di produkto i destinashon di profeshonalnan hulandes di biahe, pa asina nan por informá i inspirá nos futuro bishitantenan mihó. E treinen di ‘E-learning’ ta optenibel pa tur agente di biahe rònt mundu ku e promé módulo na hulandes ku a keda lansá komo programa piloto. Den e kuartal binidero TCB lo hasi invershon pa lansa e Programa di Eksperto di Boneiru riba tur merkado i den kuater diferente idioma.

Den futuro TCB lo amplia e Programa di Eksperto di Boneiru tambe ku mas módulo tokante historia di nos isla i nos patrimonio kultural pa por informá nos partnernan den eksterior mihó. TCB ta rekonosé e ròl importante ku e sektor di biahe tin den desaroyo di nos industria turístiko i pa e motibu akí ke mehorá e ‘Eksperensia Boneiru’ pa medio di introdukshon di e Programa di Eksperto di Boneiru.

Pa mas informashon, bishitá: https://ett.etraveltraining.eu/nl/Bezoekers/Trainingen/Details- training/3698/bonaire