KRALENDIJK- Tourism Corporation Bonaire (TCB) ta spera hopi di partisipashon di Boneiru den e sertamen di Miss Universe ku lo tuma lugá na Mexico e aña aki. 

Resientemente, ya a anunsiá ku TCB, na nòmber di Bonaire, a atkerí e derechi pa organisá e sertamen pa un Miss Boneiru lokalmente, pa asina por manda un kandidata tambe na e sertamen. 

Pa e aña 2024, Ruby Pouchet lo representá e isla den e sertamen internashonal. Durante un seremonia riba diabièrnè  atardi, Pouchet ofisialmente a risibí e korona. 

Direktor di TCB, Miles Mercera, ta mira den e partisipashon di e isla na e sertamen di beyesa un oportunidat pa stimulá konosementu i apresio pa herensia kultural di Bonaire. 

Gratitut

Den su promé diskurso komo Miss Universe Bonaire 2024, Ruby a ekspresá su gratitut i entusiasmo pa e biahe ku ta bini. “Mi ta sinti mi honrá pa representá Bonaire riba e skenario internashonal aki, i mi kuenta ku e sosten di mi isla,” asina Pouchet a bisa^.