Aerolinea i biahamentu

Tienda di konsumidó ta entregá keho riba Z Air despues di problema ku formulario di imigrashon di Aruba

Un avion di Z Air riba pista di aeropuerto Boneiru. Foto: ABC Online Media

KRALENDIJK – Fundashon Tienda pa Konsumidó Boneriano (FTPKB) a entregá un keho npa Inspekshon Medio Ambiente i Transporte (ILT) riba e kompania di aviashon Z Air.

E keho ta relashoná ku un pasahero ku destinashon Aruba ku a yega bali di Z Air, sin a yena e formulario EmbarcationDesembarcation (ED-formulier). Outoridatnan di Aruba ta eksihí e formulario aki pa por laga un pasahero  embarká pa un buelo pa Aruba.

Ora ku e pasahero no tabata por òf no tabata ke a yena e formulario, el a kambia su biahe pa Kòrsou. Pa esaki Z Air a kobra e pasahero un tarifa di 80 dòler. Na nòmber di e pasahero FTPKB a entregá un keho na Z Air. E kompania di aviashon sinembargo a mustra ku e pasahero mes ta responsabel pa yena e formulario-ED i a referí na e website-ED di Aruba, kaminda e informashon lo ta disponibel na Hulandes. 

“Ta importante ku kompanianan di aviashon ta informá su pasaheronan den idioma komprendibel, sigur na Hulanda Karibense kaminda Papiamentu i Hulandes ta e idiomanan ofisial,” segun Giovanna Frans, direktora di FTPKB. Frans no ta di akuerdo ku e kompania di aviashon ta duna solamente informashon na Ingles i Spañó riba su website, pero no na Papiamentu òf Hulandes.

Propio eskoho

Den un reakshon riba preguntanan di ABC Online Media gerente di Z Air ta bisa ku e no ta di akuerdo ku e keho di FTPKB. E kompania di aviashon ta mustra ku e outoridat di aviashon na Aruba por duna but si laga pasaheronan biaha sin a yena e formulario adelantá. Tambe e pasahero mester paga un tarifa di entradana pais Aruba. Segun Z Air e informashonnan aki ta menshoná riba tur su pasashinan.

“E pasahero en kestion a skohe konsientemente pa no biaha pa Aruba mas, pero ke bula awor pa Kòrsou. A mustr’é ku lo tin gastu mará na esaki; algu ku el a bai di akuerdo kuné.”

Z Air a indiká tambe ku a duna e pasahero e oportunidat pa yena e formulario na bali òf biaha pa Aruba na un otro orario sin gastu adishonal, despues ku su papelnan lo tabata yená. E pasahero no kier a hasi uzo di esaki. E kompania di aviashon ta di opinion ku el a aktua korekto i husto.

Deel dit artikel