KRALENDIJK- Otro siman e tim di Pony League ta biaha pa Puerto Rico pa kompetí den e weganan di Seri Del Caribe 2022. Relashoná ku esaki, djaluna atardi e tim Pony League U14 a presentá nan uniformnan.

Patrick Diepgrond, di Caribe Car Rental, ta e persona ku a hinka su konfiansa den e muchanan i a spònsernan unifòrm, tambe pa e coachnan. E ta e spònser mayó. Promé ku a presentá e unifòrmnan nobo,  

Andy Ignacio a dirigí algun palabra na e muchanan. “Nos a traha duru pa e selekshon ta bon prepará, muchanan hasi boso esfuerso pa bon resultado. Otro kos, no lubidá skol i pone solamente deporte pa dilanti. Skol ta mas importante pa boso futuro! Sigui ku e bon trabou. Danki na Indebon ku a yuda enormemente. Nos ta gradisí Fundashon Wega di Number Boneiru (FWNB) pa nan kontribushon.” 

Patrick Diepgrond, di Caribe Car Rental, a bisa ta importante pa muchanan ta bon disipliná. Mi a mira boso seriedat i a spònser boso. Éksito  ku e weganan na Puerto Rico.”

Uniform

Andy a duna un splikashon di e unifòrmnan. El a bisa ku ántes tabata diseñá unifòrm un kolo, awendia nan ta poko mas trendi.

E delegashon ku ta biaha ku e muchanan ta konsistí di: Clinton Kirindongo, Rosetty Beaumont, Manager, Jonathan Martijn, Georgino Saragoza i Juan Lantigua.