KRALENDIJK – Despues di algun dia di tenshon i rumornan kresiente, pas a bolbe bèk na Scholengemeenschap Bonaire (SGB) nèt promé ku fin di siman. E malkontentu a surgi pa despues di un rapòrt krítiko di inspekshon di enseñansa anto un retiru inesperá di e direktor di unidat VMBO, Francis Pieter.
Awor por bisa ku ku e posibel retiru ta for di mesa. Na lugá di esei ta bai trese kambio den e tim di gerensha di e skol, kaminda lo bai fungi ku 3 direktor, di kual Pieter te un di nan.
A logra yega un akuerdo entre partidonan, despues di esfuersonan di e èks gezaghebber interino Nolly Oleana komo mediadó. E gerensha aktual i tambe miembronan di e hunta di supervishon (Raad van Toezicht) tambe tabata involví den e proseso aki. Despues di tres dia di kombersashon intensivo i bata ora di negosashon, e partidonan a yega na un akuerdo djabièrnè ku ta aseptabel pa tur esnan involví.
Den un mensahe interno pa e personal di e unidat di VMBO, gerensha a ekspresá di ta lamentá e manera ku kos a kana. “E no mester a bai asina aki,” tin entro otro skibí den e komunikado.
E direktor di e e unidat VMBO, Francis Pieter, a yama e dianan tras di lomba “hopi pisá.” “Tantu personal ku profeshonal. Mi a dediká 35 aña di mi bida ku kurason i almo na enseñansa i mi ta sintimi konektá ku e ekipo i nos alumnonan.” Pieter a mustra su satisfakshon ku e resultado di e negosashon: “Mi ta un proponiente di kambio, kolaborashon i sosten.”
Pieter a ekspresá su apresio pa e tim di VMBO: “Mi ta orguyoso di e ekipo di VMBO. Di boso esfuerso, perseveransha i kompromiso.”
Huiswerk
Ounke ku awor tin un akuerdo, no tur kos ta kla ainda. E forma di gerensha nobo mester wòrdu formalisá i e tambe e distribushon di tarea dentro di e gerensha mester wòrdu deliñá ainda.
Pieter mientrastantu lo resumí su trabou komo director di e unidadtdi VMBO djaluna awor. Segun e akuerdo ku partidonan a yega na dje, Pieter lo keda parti di e ekipo di gerensha te ora ku e baha ku penshun.