Ekonomia

Tourism Corporation Bonaire presente na bolsa di ITB na Berlin

BERLIN/KRALENDIJK- Tourism Corporation Bonaire (TCB) a partisipá for di 5 te 7 di mart na e Bolsa Internashonal di Turismo (Internationale Tourismus-Börse – ITB) na Berlin, Alemania, e bolsa B2B mas grandi di Oropa, den kolaborashon ku e Ofisina Hulandes pa Turismo i Kongreso (Nederlands Bureau voor Toerisme en Congressen – NBTC). Miles Mercera, direktor di TCB i Marjolein Oleana, Business Manager & Europe Liaison a duna guia na Boneiru su representashon na e bolsa di ITB.

Na aña 2023 TCB i NBTC a drenta den un laso di kolaborashon, kaminda TCB ta haña oportunidat pa kolaborashon riba vários tereno ku NBTC. Boneiru su partisipashon na diferente bolsa ta forma un parti integral dentro di e kolaborashon ku NBTC.

Durante e bolsa e tim di TCB a establesé kontaktonan intensivo ku potensial operadónan nobo di tour di Alemania i otro partidonan importante den e industria di biahe di abla aleman. E meta tabata pa sigui promové i posishoná Boneiru riba e merkado aleman i realisá kolaborashonnan nobo pa nos isla. 

TCB a pone komo meta pa enfoká mas ainda riba e merkadonan aleman, austriako i suiso, konosí komo e merkado GAS (Germany, Austria, Switzerland). Mas aleu e enfoke ta riba promoshon di Boneiru dentro di e merkadonan akí i atraé mas bishitante for di e regionnan akí.

Éksito

“E bolsa di ITB tabata un éksito grandi pa nos tim. Yen di konfiansa nos ta inisiá kolaborashonnan nobo pa hasi Boneiru mas fuerte na Alemania i su paisnan besiña”, segun Miles Mercera, direktor di Tourism Corporation Bonaire.

E tim di TCB ta wak bèk riba un bolsa di ITB sumamente eksitoso i ta desidido pa drenta den kolaborashonnan nobo, ku lo pone Boneiru den un forma mas fuerte ainda riba mapa dentro di e merkadonan di abla aleman. 

Deel dit artikel
Rocargo
Rocargo
Rocargo
Rocargo