KRALENDIJK – Tourism Corporation Bonaire (TCB) a firma un kontrato kolektivo nobo (CAO) pa su empleadonan ku sindikato ABVO. Despues di kasi 2 aña firmamentu di e CAO nobo a keda realisá komo resultado di e negosashonnan ku tabata andando pa logra esaki. Sr. Miles Mercera, direktor di TCB ta kontentu ku porfin por a finalisá e proseso akí. Mester hasi menshon tambe ku e shopstewardnan Sra. Joanny Trinidad i Sr. Rolando Marin a duna nan aporte balioso pa yega na konkretisashon di e CAO nobo.

“Komo Direktor di TCB mi ta hopi kontentu ku e logro akí pa duna kontenido na e fundeshi di TCB ku ta nos empleadonan. Pa ami, nos empleadonan ta representá 100% di nos logronan komo organisashon i sektor i awe nos a perkurá pa nos tim tin tur loke nan tin mester pa por funshoná den un era nobo di trabou i pa logra nos metanan pa e aña binidero. Pabien na tur empleado i mui espesialmente na nos koleganan Marjolein Oleana i Joanny Trinidad ku a forma un parti importante den e proseso aki. TCB ta kontentu ku nos por sigui konta ku e aporte di ABVO”, segun Miles Mercera.