Trabounan di konstrukshon di Sunset Beach Park ta progresando

KRALENDIJK – E trabounan relashoná ku konstrukshon di un parke di rekreashon públiko na Sunset Beach, entre Chogogo Beach Resort i Den Laman Condominiums, ta progresando sumamente bon. For di e inisio na luna di febrüari 2023 a logra un progreso signifikativo.

Realisashon di e konstrukshon infrastruktural di e parke por ehèmpel ta práktikamente kla, a pone pipa bou di tera pa desagwe i kloaka i a instalá e fasilidatnan pa koriente i internèt. Aparte di esaki ta trahando tambe riba e parti di bich. Riba petishon di Stichting Nationale Parken Bonaire (STINAPA) a koba saka e greis kantu di awa pa evitá ku esaki ta resultá den laman. Durante e simannan binidero lo konstruí muraya di betòn pa wanta materialnan indeseá pa por protehá e kosta i a pone piedra di koral, ku BOG a risibí komo donashon di Cargill pa e proyekto. Tur esaki ta tuma lugá di konformidat kompleto ku e pèrmitnan presente i nos legislashon lokal.

Kantidat grandi di fasilidat

Na momentu di entrega na aña 2024 Sunset Beach Park lo tin un kantidat grandi di fasilidat pa ofresé, manera un lugá pa hala boto, un bahada pa personanan ku limitashon físiko por drenta laman fásilmente i diferente palapa, kiosko i tualèt públiko. Ku sitionan pa prepará barbekiú i hasi ehersisio, tantu pa hende grandi komo pa mucha, ta realisá tambe posibilidatnan moderno, duradero i aksesibel di rekreashon. Adely Susanan-Jansen, direktor di Bonaire Overheidsgebouwen NV (BOG) ta bisa ku e ta kontentu ku progreso di e proyekto spesial akí: ‘Dentro di poko Boneiru por ta orguyoso di un parke sumamente bunita i moderno. Mi ta kontentu di por bisa ku den ehekushon di e proyekto akí nos a tene kuenta tambe ku tur e leinan di naturalesa na Boneiru pa protekshon di nos medio ambiente i nos parke bou di laman.’

Vários proyekto

Susana-Jansen ta enfatisá mas aleu ku ta hasi uso prinsipalmente di materialnan sostenibel ku no ta afektá nos medio ambiente i tambe ku tin un bon kolaborashon mutuo entre tur e partidonan, entre otro STINAPA, Entidat Públiko Boneiru, WEB, TELBO i e kontratista prinsipal Bonairiaanse Wegenbouw Maatschappij N.V. (BWM) i sobra kontratistanan Elektropro B.V i APA Construction NV. Aparte di Sunset Beach Park, BOG tin vários otro proyekto ta kana pa embeyesimentu di nos isla. Resientemente por ehèmpel a konstruí un hardin dilanti di Kompleho Deportivo Jorge Nicolaas na Kaya Amsterdam. BOG ta trahando den estrecho koperashon ku INDEBON pa sigui profeshonalisá e maneho di e kompleho deportivo. Tambe no muchu tempu pasá BOG a hasi petishon na Entidat Públiko Boneiru pa por manehá e rotònde di Hato enfrente di e parke, di manera ku por drecha esaki kompletamente i sigui manten’é tambe, pa asina e forma un bunita totalidat ku e parke.