Trahadónan preokupá di BonLab ta skibi karta pa BC

KRALENDIJK- Trahadónan preokupá di BonLab djaluna ku a pasa a dirigí un karta pa kolegio ehekutivo, pa ekspresá nan inkietut pa futuro di e instituto.

E inkietut ta bin despues di e notisia ku ZVK lo no ta dispuest pa sigui traha ku BonLab, ya ku e laboratorio lo no ta akreditá. Tambe tin rumornan ta kore ku kolegio ehekutiv lo ke sera e laboratorio, na favor di esun na Fundashon Mariadal. 

E trahadónan ta malkontentu tambe ku un análisis krítiko ku un konsehero, Robert Wever a traha di e instituto for di aña 2018. Segun e empleadonan ta skibi, e análisis no ta duna un bon refleho di e oportudatnan ku tin pa BonLab. 

Independiente

Aunke un tempo tabata tin un plan pa laga BonLab i e laboratorio di Fundashon Mariadal bai huntu den un laboratorio mas grandi, al fin no a sigui ku e plan aki. Tòg trahadónan tin miedo ku BonLab ta bai wòrdu sakrifiká na bentaha di Mariadal. 

Na aña 2013 Konseho Insular a pasa un moshon pa asigurá eksistensia di BonLab.