Tres detenshon durante di kòntròl multidisiplinario

Kralendijk- Den e mardugá di djabièrnè 12 di mart pa djasabra 13 di mart, Kuerpo Polisial Hulanda Karibense den kolaborashon ku Koninklijke Marechaussee (KMAR) i e direktorado di Supervishon i Mantenshon di Entidat Públiko, a tene un kòntròl multidisiplinario den vários bario na Boneiru.

Durante e kòntròl a hasi tres detenshon en konekshon ku violashon di reglanan di e ordenansa di emergensia i pa no duna oido na òrdu di polis. Ta trata aki di un hòmber di inisial R.D.W. 48 aña di edat, un hòmber di inisial C.L.H. di 40 aña di edat i un dama di inisial C.M.P. di 43 aña di edat.

Vários establesimentu di hòreka ta kumpli ku e reglanan, pero na algu sitio a duna atvertensia i/òf tep pa prevení aglomerashon. A duna un total di 13 prosès ferbal na siudadanonan ku no tabata kumpli ku regla.

Kampvuur

Na un bich a topa ku un grupo di 9 persona. Tur 9 persona a haña un prosès ferbal komo ku nan no tabata kumpli ku e reglanan di e ordenansa di emergensia i tambe pa sende un ‘kampvuur’ riba e bich.

E tim multidisiplinario lo sigui kontrolá di forma aktivo e periodo benidero. Na momentu ku no ta kumpli ku e ordenansa di emergensia lo duna un prosès ferbal.

Lesa tambe:

• 
  Vakatura General Manager Beveiligingsbedrijf Bonaire
• 
  Boneiru ta papia ku aerolíneanan tokante posibel ruta nobo 
• 
  Atrako na kas na Belnem
• 
  Gezaghèber Rijna ta boga pa solidaridat den e lucha kontra kambio di klima 
• 
  Demokrat a hasi otro invitashon na UPB pa sinta na mesa