AMSTERDAM – Kompania di aviashon TUI ta bai invertí den puntonan di rekargá pa outonan eléktriko na Aruba, Kòrsou i Boneiru. Den koperashon ku e empresa lokal Dynaf lo bini for di komienso di aña 55 punto di rekargá. Trinta na Kòrsou, diessinku na Aruba i dies na Boneiru.

Ta buta nan na diferente lugá , tantu na hotèlnan komo na lugánan ‘lógiko’ manera un supermerkado i hòtspòtnan turístiko popular. Tambe lo buta algun punto di rekargá ku un asina yamá  ‘carport solar’ na lugánan kaminda koriente no ta algu natural, por ehèmpel na playanan alehá.

Ayera a lansa e proyekto ofisial ku inougurashon di e promé punto di rekargá,  ku a pone den uso simbóliko mésora konektando un outo eléktriko.

Na 2019 Grupo Dynaf a start ku sistemanan di rekargá D-POINT i ta e promé station di rekargá na Kòrsou. Na e momentu aki e ret di D-POINT tin setenta konekshon aktivo ku mas ku 28.000 transakshonnan di rekargá ku a prosesá i kaminda a entregá mas ku 240.000 KWh riba e tres islanan.

TUI a introdusí na mart 2021 e konsepto Fair Travel. Kada pasahero ku ta buk un biahe Fair Travel, ta kontribuí ku 2 euro i TUI mes tambe ta kontribuí ku 2 euro. Ta usa parti di e sèn ei pa finansiá invershon den puntonan di rekargá.

Na e momentu aki tin apénas outonan eléktriko riba e islanan ABC, lokual ta okashoná por parti pa e echo ku apénas tin puntonan di rekargá. Pesei TUI Hulanda i Bélgika ta invertí den puntonan di rekargá na e destinashonnan aki.

Arjan Kers, general Manager di TUI Hulanda ta bisa ku awor su empresa a pone e promé stap. “Awor ta toka turno na hürdónan i bendedónan di outo pa pèrkurá pa ámplia e parke di outo.”