KRALENDIJK - Ayera Fundashon Músika Original Krioyo ‘MOK’ a bisa durante nan reuda di prensa, ku tur kos ta kla pa Kanto Krioyo 2025.
Maikel Janga presidente di MOK, a bisa ku ta serka di drenta e luna tan sperá, luna di selebrashon di Dia di Rincon 2025. Fundashon MOK ku ta enkargá ku organisashon di Festival Kanto Krioyo, tantu grandi komo hubenil, ya ta a la karga ku preparashonnan pa ku e próksimo Kanto Krioyo. E aña aki e ta tuma lugá di 9 pa 12 di Aprel 2025.
Manera por a ripará e aña aki Kanto Krioyo Hubenil ta riba un djabièrnè i no djadumingu manera tabata e kaso. Djadumingu 13 di Aprel ta inisio di siman santu, esta “Domingu di Rama” (Palmzondag). Pa e motibu aki Fundashon MOK a opta pa organisá e festival hubenil riba djabièrnè 11 di Aprel 2025, riba e dia ku normalmente mester ta liber pa Festival Kanto Krioyo.
Dos banda
Tambe Fundashon MOK e aña aki a forma dos banda hubenil independiente ku lo bai kompañá tur nos partisipantenan Hubenil. Esaki mirando ku tin kantantenan ku ta deseá pa partisipá i no por haña banda pa kompaña nan, alabes pa garantisá ku den futuro nos Kanto Krioyo Grandi ta sigui eksistí ku 3 anochi di festival. Di e manera aki, e kantante por haña chèns i banda pa por partisipá na nos festivalnan.